اتفاقية شركاء شاري
الإصدار 1 — نوفمبر 2026الاتفاقية دي بين «شاري للعقارات» (شاري) والوسيط الفردي أو شركة الوساطة اللي بيسجّل في «شركاء شاري» (الشريك). الموافقة عليها في طلب الانضمام بتعتبر موافقة على كل بنودها، ونسب العمولة النهائية بتتكتب في الاتفاق اللي بيتوقّع مع فريق شاري.
1التعريفات
- المالك: صاحب الوحدة (بيع أو إيجار) اللي الشريك بيمثّله — وده عميل الشريك.
- العميل: المشتري أو المستأجر اللي بيوصل للوحدة من خلال منصات شاري (الموقع، الأبلكيشن، الإعلانات، Shary AI) — وده عميل شاري.
- لوحة الشريك: صفحة الشريك على الموقع والأبلكيشن اللي فيها وحداته وأرقامها.
2حساب الشريك
- الشريك لازم يعمل حساب على شاري باسمه ورقم موبايله، وبعدين يبعت طلب الانضمام بالورق المطلوب.
- الوسيط الفردي: البطاقة الشخصية وش وضهر. الشركة: السجل التجاري والبطاقة الضريبية وبطاقة صاحب الشركة وش وضهر.
- شاري بيراجع الطلب ومن حقه يقبله أو يرفضه، والقرار بيوصل للشريك على الواتساب.
- كل شريك ليه مسؤول حساب من فريق شاري بيتابع معاه.
3التزامات الشريك
- يعرض بس وحدات عنده موافقة أصحابها على عرضها وبيعها أو تأجيرها.
- بيانات الوحدة وسعرها وصورها تكون حقيقية ومحدّثة، ويبلغ شاري أول ما الوحدة تتباع أو تتأجر أو يتغير سعرها.
- ما يرفعش نفس الوحدة أكتر من مرة.
- ما يتواصلش مع عملاء شاري (المشترين أو المستأجرين اللي جايين من خلال شاري) من غير ترتيب مع فريق شاري.
4التزامات شاري
- يراجع كل وحدة وينشرها بكود ويحسّن عرضها (الصور والوصف) ويعلن عنها على منصاته.
- فريق مبيعات شاري بيتابع مع العملاء، ويرتب المعاينات والتفاوض.
- شاري بيقدّم خدمة عقود البيع (الريسيل) والإيجار للصفقات اللي بتتم من خلاله.
- شاري ما بيتواصلش مع المالك من غير الشريك، ورقم الشريك ما بيظهرش في الإعلان.
- الشريك بيشوف أرقام وحداته (المشاهدات والطلبات) في لوحة الشريك، وبيوصله على الواتساب أول ما وحدة تتنشر أو عميل يسأل.
5العمولة
- عميلك من طرفك ليك، وعميلنا من طرفنا لينا: عمولة المالك للشريك، وعمولة المشتري أو المستأجر لشاري.
- نسب العمولة وطريقة ومواعيد سدادها بتتكتب في الاتفاق اللي بيتوقّع مع فريق شاري قبل أول صفقة.
- الصفقة بتتحسب من خلال شاري لو العميل وصل للوحدة عن طريق منصات شاري أو فريقه.
6الخصوصية والورق
- ورق الشريك بيتحفظ في مكان محمي، وبيستخدم بس للتأكد من هويته، وما بيتشافش غير من فريق شاري المسؤول.
- بيانات العملاء ما بتتديش للشريك إلا لما الصفقة تتنسق مع فريق شاري.
7الحساب والتعديلات
- العضوية ببلاش دلوقتي، ولو اتضافت اشتراكات بعدين هيتبلغ بيها الشريك قبلها.
- من حق شاري يخفي وحدة أو يوقف حساب الشريك لو بند من الاتفاقية دي ما اتنفذش.
- شاري ممكن يحدّث الاتفاقية دي، ولما يحصل هيتبلغ الشريك ورقم الإصدار هيتغير.
- الاتفاقية دي خاضعة للقانون المصري.